المجال لي بزاف ناس كيسولو عليه.. و كيبقا من المجالات لي ناس بزاف فاش جاو لألمانيا بدلو ليه و بداو فيه
مجال اليوم هو : ZFA 
Zahnmedizinische Fachangesetllte
مساعد/ة طبيب الأسنان
هذا صراحة من المجالات الزوينة بزاف و خصوصا بالنسبة #للبنات و حتى لبنات لي دايرين #الحجاب 
.. مجال نقي و المحيط ديالو زوين.. كتنخدم من بعد فالعيادات او المستشفيات في قسم طب الأسنان و فالأوسبيلدونغ كتعلم اي حاجة عندها علاقة بهاد المجال كالمساعدة فعلاج المرضى.. كتعلم تستعمل جميع الأجهزة الخاصة بالأعشة.. و كتعلم كل حاجة خاصة بداكشي ديال مواعيد المرضى و كل ماهو اداري. - شحال المدة ديال هاد #الأوسبيلدونغ ؟
غالبا 3 سنوات و خصوصا للناس لي معندهاش تجربة كافية فهاد المجال.. اما لاكنتي خدمتي فيه بزاف فالمغرب.. فاش تجي و شوفوك مزيان.. راه تقدر تقلص المدة لسنتين و نصف او اقل
- اشنو هوما الشروط باش ندفع لهاد #الأوسبيلدونغ ؟
نيڤو باك ولا الباك او ما فوق
مستوى اللغة من الأحسن B2 باش يكونو عندك حظوظ بزاف حيث B1 ناقص شوية و تكون كتهدر شوية مزيان و يكون عندك حس التواصل
يستحسن الواحد يكون عندو شي تجارب و لا شوية الخبرة فالمجال
يكون عندك حسن اللباقة و الهدوء و تعرف كيفاش تعامل مع المرضى..
تكون عندك واحد شوية الخبرة فالكميوتر 
و دوك البرامج ديال تنظيم المواعيد و داكشي - اشنو المهام لب كندير فهاد #الأوسبيلدونغ ؟
مثلا كتعقم الغرفة و الأدوات لي كيخدم بيها الطبيب و كيدير بيها الفحص و العمليات
دير صور بالراديو للمرضى
كاتوجد مثلا دوك الحشوات باش كيعمر الطبيب للمرضى الفم ديالهم
تنظيم مواعيد و بيانات المرضى فالكومبيوتر
كتقدم بعض مرات نصائح للمرضى من بعد ماكايسالي طبيب داكشي لي دار (يعني التواصل)
استقبال المرضى ف غرفة المعاينة و غرفة العمليات و تهدر معاهم و تكون لطيف معاهم بطبيعة الحال
ديما كتقلب واش غاع الأدوات لي محتاجها طبيب كاينة و موجودة..
فاش كيكون طبيب خدام كتكون حداه و اي حاجة طلبها منك كاتساعدو فيها
- فين نقدر ندير هاد #الأوسبيلدونغ ؟
عيادات الأسنان العامة و الخاصة
المستشفيات (قسم طب الأسنان) - اشنو المواد لي كيقرا الواحد #فالمدرسة ؟ كتقرا اي حاجة كتعلق بهاد المجال فالمجال الصحي.. و هادو بعض المواد لي كتقرا حتى هي :
1- الرياضيات.
2- بيولوجي
3- اللغة الألمانية.
4- فيزياء.
5-علم الإجتماع
6-معالجة البيانات
7-ادارة العيادات
- شحال الصالير ديال هاد #الأوسبيلدونغ ؟
الصالير كيبقى على حسب الولاية و على حسب كل مدينة يعني مايمكنش تجمع المانيا كاملة.. كل منطقة و شحال و لكن تقريبيا :
السنة الأولى : تقريبا 950€
السنة الثانية : تقريبا 1050€
السنة الثالثة : تقريبا 1150€
- فين نقدر نخدم فاش نسالي #الأوسبيلدونغ و شخال الصالير فالخدمة ؟
تقدر تخدم فالعيادات ديال تقويم الأسنان.. تقدر تخدم فالمستشفيات (قسم الأسنان)
تقدر تخدم فمختبرات عندهم علاقة بصناعة الأسنان
تقدر تخدم حتى فعيادات ديال الطب العامبالنسبة للصالير فحتى هو على حسب مل منطقة و كل ولاية.. و لكن كيكون تقريبا بين 2500€ حتى 3000€ و كل مازادت التجربة و الخبرة ديالك كلما صالير كيزيد
خلاصة : هذا المجال صراحة شخصيا كيجيني من احسن المجالات و خصوصا للبنات.. مجال نقي و غالبا دائما عندك Week end خاوي ديالك.. و حتى Feiertage راه ماكاتخدمش.. مجال فيه خصاص حيث طب الأسنان كايتزاد عدد المرضى كل سنة بزاف و خصوصا فألمانيا مع موجة المهاجرين و حتى الآلمان يعني كيبقى من المجالات لي مطلوبين..
نصيحتي بحال دائما : اللغة اللغة اللغة ثم اللغة.. كاتسهل عليك بزاف الحاجات.. مثلا حتى تعامل فالخدمة الى كانت لغتك مزيانة و كتفهمهم فراه غا ي يتعاملو معاك مزيان و غادي تحس براسك مرتاح فالأوسبيلدونغ ديالك.. و العكس صحيح.