هاد المجال زوين و نقي و خصوصا #للبنات ( حتى لي دايرن الحجاب 
) بحيث فهاد المجال سوى ف اوسبيلدونغ و لا ف الدراسة فالجامعة ديال هاد الشعبة كيكونو لبنات كثر من دراري بنسبة 70% او اكثر و هذا شيء طبيعي حيث البنات كيعرفو يتعاملو اكثر من دراري فيما يخص #التربية. هاد الخدمة كتعتابر من احسن الخدمات #للنساء ف ألمانيا حيث كتعطيهم فرصة ياخدو تجربة فمجال التربية لي غادي تنفعهم حتى في حياتهم الشخصية مع اطفالهم
هاد #الأوسبيلدونغ و هاد العمل ديال Erziehung كيتعتابر من اهم الأعمال لي كتعطاهم أهمية كبيرة ف المانيا حيث بطبيعة الحال كيتعلف بتربية الأطفال و لي هوما اساس المجتمع فالمستقبل. بحيث كايحاولو يوفرو ليهم الرعاية و التعليم المناسب باش يكون نمو ديالهم مزيان.
#الأوسبيلدونغ كيشمل التدريب على مجموعة متنوعة من المهارات والمعرفة، مثل رعاية الصحة والنمو الطبيعي للطفل، وتطوير الأنشطة التربوية والترفيهية المناسبة للأطفال.
- شحال من سنة ف هاد الأوسبيلدونغ ؟
من سنتين الى 3 سنوات.. بالنسبة للناس الأجانب غالبا 3 سنوات.. الى فحالة مانت عندهم خبرة طويلة فهاد الخدمة ف المغرب فاش كيجي يقدرو ينقصو ليه المدة الى كان مزيان ف السنة الأولى. - الشروط باش ندفع لهاد #الأوسبيلدونغ ؟
من حيث اللغة ماص تكون مزيانة و غالبا من B2 و نتا طالع
ماشي ضروري يكون عندك #الباك و لكن ثاني لي عندو #الباك كيبقى عندو فرص احسن 
يكون عندك تجربة فهاد المجال و الى كانت مع الأطفال فراه عندك اسبقية على واحد اخر.
بطبيعة الحال لي باغي يدير هاد الأوسبيلدونغ خاص يكون عندو الخاطر كبير و مايكونش كيتعصب و تكون كتحمل نفسيا و عقليا داكشي لي كيدرو دراري صغار (حيث ماشي اي واحد كيستحمل)
- شحال الصالير فالسنوات ديال #اوسبيلدونغ
على حسب الولايات فألمانيا يعني داكشي ماشي بحال بحال! و لكن الى كان الصالير نازل راه يقدر الواحد يدفع باش ياخد مساعدة من BAB.. المهم الصالير تقريبا :
1- السنة الأولى يكون الراتب حوالي 1100 يورو شهرياً.
2- السنة الثانية يكون الراتب حوالي 1200 يورو شهرياً.
3- السنة الثالثة يكون الراتب حوالي 1300 يورو شهرياً.-
اشنو المواد لي كيقرا الواحد فهاد #الأوسبيلدونغ ؟
* علم النفس
* الرسم
* الأعمال المنزلية
* الألمانية
* الإنجليزية
* القانون
* الرياضيات
* الأخلاق
- فين كيخدم الواحد من مور فاش يسالي #اوسبيلدونغ ديالو ؟
* في روضات الأطفال
* في مراكز الإرشاد الأسري
* في مراكز رعاية الأطفال /الشباب
* في مراكز لذوي الاحتياجات الخاصة
- واش هاد #الأوسبيلدونغ مطلوب و فيه خصاص ؟
بطبيعة الحال هادا من المجالات لي فيه خصاص كبير و خصوصا مع موجة #الاجئيين لي جات لألمانيا راه ولا خصاص بزاف و ثاني حاجة بالنسبة لينا كمغاربة
راه عندكم ميزة زايدة و هي اتقان اللغة العربية و شوية الفرنسية و الإنجليزية و عاد الألمانية.. حيث ف المدن الكبرى راه كيكون اماكن العمل فيها اطفال و شباب من دول و ثقافات مختلفة
و دبا بعض الاسئلة لي كنشوف ناس بزاف كتسول عليها حيث كيسمعو بعض الهدرة من شي ناس ف السوشل ميديا و لا شي اخبار لي ماعاندهاش مصداقية.. الأسئلة بخصوص : -
واش بصح كيقريو داكشي ديال ا#المثلية 
الجواب هو لا ماشي كيقريوها حيث اصلا الألمانيين براسهم ضد هادشي.. و باغيين ولادهم يكونو عاديين.. الإختلاف كاين غير فانك ماخاصكش تكون تهدر على هاد الموضوع بتعصب و تبدا تقوليهم هادشي حرام و ديك الهدرة.. حيث اولا ف القانون هادوك صحاب الألوان عندهم حقوق و من حقهم يكونو كيف بغاو.. و ثانيا حتى نتا ماكيفرض عليك حتى واحد دير شي حاجة ماباغيهاش.. يعني ماتبقاوش تسمعو صحاب الأخبار بدون مصدر 
- واش كيرفضو عليك تقري #الدين لي بغاو هوما ؟
الجواب هو : لا الى قريتي الدين فغالبا كتقري داكشي لي نتا عندك عليه دراية و فهاد الحالة ف بطبيعة الحال كتقري الدين الإسلامي للأطفال من والدين مسلمين
خلاصة : هاد الضومين زوين بزاف.. و خصوصا للبنات .. و حتى الصالير ديالو زوين.. و الى كان عندك ولدك ولا بنتك فالمستقبل ف كادخلهم معاك للبلاصة فين كتكون خدام يعني ماكايكونش عندك مشكل معامن تهليهم ..
ضومين مافيهش مثلا شي حاجة لي حرام بالنسبة للناس لي ماكايبغيوش شي مجال فيه الشبهات فالدين. المرة الجاية نهضر على مجال اخر
الله يكمل عليكم ب الخير و الله يسهل على الجميع..